Salud, Rebeldía y Cerveza Fría
"Un pueblo culto es un pueblo libre" José Martí

Dibujo de Carlos Azagra.

MULLERS INDEPENDENTISTAS D’ARAGON CONTRA LA BIOLENZIA DE CHENERO

En o 2009 en Aragón no s’ha dau garra muerte por biolenzia de chenero, manimenos son 700 as denunzias presentadas, a ran estatal se plega en alto u baixo as 50 muertes.

Encara que a biolenzia fisica y más que más a d’as bictimas mortals ye a más bistera, por no dizir a unica a la que se l’atorga importanzia dende bels ambitos d’a soziedat, no’n ye a unica, a biolenzia ent’as mullers tien o suyo orichen en as relazions de desigualdat, en o mantenimiento d’una soziedat patriarcal y en una bisión androzentrica d’o mundo. Ta conseguir acotolar ista pasa emos d’esmontar muitos d’os estereotipos y ideyas preconzebidas, clabadas en a nuestra soziedat de traza remanén grazias a una sozializazión desigual y inchusta y que se mueben grazias a o beiclo d’o luengache.

Un luengache que esbalgua de contino a la muller. Cuan isto acayeze a ran indibidual s’achique l’estima d’a colla oprimida, atorgando de traza directa y conszién mayor control a l’abusador. A ran colectibo acayeze lo mesmo, prinzipalmén a trabiés d’os meyos de comunicazión, do a publizidat rebaixa terne que terne a imachen d’a muller ligando-la con estereotipos sexuals irreyals. A trabiés d’o luengache, l’emplego de parolas tan cutianas como “isteria” portan connotazions despectibas ent’as mullers ya que a suya radiz epistemolochica bien d’o griego histerius “matriquera”, ligando a mullers fuera de control y a reyazions desacheradas. En l’ambito laboral, infrabalguando treballos ligaus con a muller. En a educazión, do son pocos os textos pedagochicos que faigan referenzia a mullers en a istoria y más en o tocán a Aragón, y asinas asinas.

Tamién nos fería goi de charrar sobre todas ixas mullers que amás d’estar oprimidas por a suya condizión de chenero tamién en son por a pobreza, o 60% d’a poblazión analfabeta son mullers, fendo-las encara más nafrables a o sistema de dominanzia-semisión.

Por isto creyemos que a biolenzia de chenero ye imposible de barallar dende un sistema imposau que rebaixa a o 50% d’a suya poblazión, as mullers, barallar a biolenzia de chenero ye meter un parche menester pero insufizién, ya que dica que no bi’n aiga d’igualdat legal y reyal en a soziedat, do se nos beiga representadas y consideradas d’a mesma traza, y no bi’n aiga de desigualdaz en os chornals, abremos de continar luitando por contimostrar a nuestra balura, o puesto que nos pertoca, con más esfuerzo que no ellos, ye por isto que no será posible o cambio tot bibindo baixo iste sistema patriarcal, caracterizau por oprimir as libertaz d’os pueblos, d’a clase treballadera y d’as mullers.

Muller no rebles!
Mullers independentistas d’Aragón